2018 (මලයාලි සිනමායාවේ)

ධීවර ප්‍රජාවේ දිවි සැරිය පිළිඹිබු කරන දර්ශන අතර මාතාචන් නම් ධීවරයා සහ ඔහුගේ පවුල අනාථ වූ ධීවර පවුල් බේරාගැනීමට ක්‍රියා කරන අයුරුත් ඔහුගේ බාල පුත්‍රයා  වන නික්සන් තම පවුලට පටහැනිව යමින් නිරූපණ ක්ෂේත්‍රය තම ආධිපත්‍යයට ගෙන ඒමට වෙර දරන අයුරු සහ එබැවින් මාතාචන් සහ නික්සන් අතර ඇතිවන අඩදබරවලින්ද මෙම සිනමා සිත්තම වර්ණවත් වී ඇත. මේ සියලු සිදුවීම් මධ්‍යයයේ හදිසියේ ඇති වන අධික වර්ෂාව හේතුවෙන් අනූප්ගේ විවාහයටද බාධා ඇති වේ. වර්ෂාව නිසා අවතැන් වූ පිරිස් පාසල්වලට පැමිණීමත් සමඟ මංජුද ඔවුන්ට පිහිට වීමට යයි. මේ අතරවාරයේ කෝෂි නම් ටැක්සි රියදුරා පෝලන්ත ජාතික යුවළක් කේරළාවේ සංචාරයට රැගෙන යන අතර අධික වර්ෂාව නිසා මාර්ගය අවහිර වීමෙන් අනූප්ගේ නිවසට ඔවුන් රැගෙන යයි. මංජුගේ සුවදුක් විමසා ඇය නිවසට රැගෙන යාමට පැමිණෙන අනූප් ගංවතුරෙන් අවතැන් වූවන්ට උපකාර කිරීමට පෙළඹෙන්නේ මංජු තම නිවසට යාම ප්‍රතික්ෂේප කිරීම බැවිනි. මෙහිදී ගර්භණී කාන්තාවක් තම දරුවා බිහි කිරීමට රෝහලට යාමට හැකියාවක් නොමැතිව තම වැඩිමහලු කුඩා දියණිය සමඟ අවතැන් කඳවුරේ සිටියි. මෙහිදී හමුදා හෙලිකොප්ටරයක් පැමිණියද අධික අඳුර සහ අහිතකර කාලගුණය හේතුවෙන් ගොඩබැසීමට හැකියාවක් නොමැතිව සිටියදී අනූප්ගේ මැදිහත්වීමෙන් එකී ගර්භණී කාන්තාව සහ කුඩා ළමයා ආධාරකය ආධාරයෙන් කිසිදු ආපදාවකින් තොරව හෙලිකොප්ටරය තුළට රැගෙන යයි. පරාජිතයෙක් සේ හාස්‍යයට ලක් වූ අනූප් තම පලා ගිය ධෛර්යය හා එඩිතරබව නැවත තමා වෙතට ළඟා කරගත්තේ අවදානාත්මක ජීවය සපිරි මනුෂ්‍යයත්වය මාර්ගයෙන්ය.

අනූප්ගේ නිවසේ සිට ඔහුගේ නිවැසියන් සමඟ විනෝදයෙන් කල් ගෙවන පෝලන්ත ජාතික යුවළ හරහා එම අදිසි මුණගැසීමේ සතුට සහ සැහැල්ලුව ප්‍රේක්ෂකයාගේ සිතෙහිද ජනිත වේ. මෙම සැහැල්ලුජනක රූපරාමුවෙන් මාතාචන් ඇතුළු පවුලේ පිරිස ධීවර ප්‍රජාවට සහාය වන අයුරු සහ නිරූපණ ක්ෂේත්‍රයට ගිය නික්සන් නැවත පැමිණ තම පියාට සහාය වන රූපරාමුවට මාරු වේ. නිරන්තරව ප්‍රේක්ෂක මනසෙහි චිත්තවේග වෙනස් කරමින් කේරළයේ ගංවතුරෙන් අවතැන් වූ ජනයාගේ ශෝකය, අසරණභාවය මෙන්ම තම උවදුරෙන් ගොඩඒමට අසීමාන්තිකව කැප වෙන ආකාරයද එකිනෙකා ඔවුනොවුන් කෙරෙහි කැපවෙමින් ලාභ ප්‍රයෝජන නොතකා දයානුකම්පාවෙන් උපකාර කරන අයුරුද ස්වභාවධර්මයාට වෛර නොකර ස්වභාවධර්මයෙන් එල්ල කරන ලද තෙත වෙඩි උණ්ඩ වරුසාවට කරුණාභරිත හදවත්වලින් යුක්තව මුහුණ දෙන මෙම නිර්භය මිනිසුන් කෙරෙහි ආඩම්බරයක් උපදවාගන්නා ප්‍රේක්ෂකයාගේ හෘදයෙහි රුධිරය උතුරා පුපුරායාමට ආසන්න වන්නේ ගංවතුරෙන් පීඩාවට පත් මිනිසුන්ට උපකාර කරන අතරතුර  නොසිතූ මොහොතක තම ධෛර්යයවන්ත මිනිස් සිරුරු අඩපණ කරගන්නා මාතාචන්ගේ සහ අනූප්ගේ ඛේදනීය අවසන් ගමන් හේතුවෙනි.

පුරා හෝරා දෙකකුත් මිනිත්තු විසි අටක් මුළුල්ලේ නොයෙක් සිද්ධිදාමයන් ඔස්සේ තම ජීවන මංපෙත වටා කැරකෙන නේක මිනිසුන් ස්වභාවික ආපදාවක් නිසා  එකම අරමුණක් ඔස්සේ තම සිත සහ මනස මෙහෙයවමින් කුලභේද, එදිරිවාදිකම් යන පටු මානසික රාමුවලින් මිදී මනුෂ්‍යයාගේ යහපැවැත්ම උදෙසා කැපවන අපූර්ව වූත් මානුෂීය වූත් 2018 ගංවතුර යුද්ධයෙන් සාක්ෂි සහිතව සනාථ කරනුයේ සියලුදෙනාම වීරයන් බවය.